| Full text |
5 Ny fiaraha-monina
6 Hono, ray tatamo tetezin-tsahona,
7 ray voahirana atopan' alona,
8 ray harefo alamaky ny omby,
9 lany ve, hono, ny hambo
10 no ny ratsy no manitsa-doha,
11 ny malemy no be fila kisa,
12 ny donendrina no avy manitsaka?
13 Ny sahona nitety dia nietaketaka,
14 ny alona tsy viza-manositosika;
15 ary ny omby bada be sady miraoka no manosihosy.
16 Sao dia efa maty hasina, hono,
17 ka hitsahin' ny amboalambo,
18 sao dia efa very haja
19 ka kibilabilain' ny malemy tsy azo!
20 Ry tatamo ravaky ny farihy,
21 ry voahirana aman-karefo endriky ny kamory,
22 raha tsontsam-paika ka matim-bela,
23 raha diso hanta ka fisaka ondana,
24 dia aza manabolasy tena
25 fa tsarovy ny hajan' ny razana!
26 Tsy mbola nisy sahona natao haingon-kamory,
27 fa ny tatamo ihany no betsimihilana
28 ary ny voahirana ihany no fehilohan-jatovo.
29 Tsy taitra, hono, kanefa taitra ihany,
30 fa manindrona am-bavafo ny tafasiry.
31 Na nanonja nanaitra fotaka aza, hono, izany rano,
32 tsy mbola nisy tatamo fefika,
33 na voahirana resin' alona.
34 Ny harefo milefolefo aza
35 mbola henjanin' ny efitra solon-taolany,
36 ka mbola azon' ny tsindretra
37 sy ny tsindrano ifikirana tsara be.
38 Ny boka, hono, no atoka-monina
39 ka izay mitady tsy ho voakasika raha mbola ety
40 dia efa nanoman-tena ho amiana,
41 ka izay mikasika an' io: ilay boka!
42 Tsy ny tatamo amana voahirana, hono,
43 no fanambonin-javatra.
44 Ary tsy ny sahona aman' ondrindrano
45 no fara faikampaikany
46 fa fiaina-mananjina ny fiaraha-monina
47 ka tsy azo entina an' avona.
48 Koa izay tsy mahalefitra ny halemen' ny hafa
49 dia hanjary tatamo ri-drano,
50 mitalapetraka am-potaka ka sady mavo no lo.
51 Koa raha ny fifandraisana amin' ny mpiara-monina
52 no anakilasiana anay ho mietry, dia ahoana àry:
53 hisinda eny Ankaratra ve tsy hiharo
54 ka hanjary paraky tsy mila ny laro?
55 Ny tongotra anefa aza mila kiraro,
56 ka ho aiza raha hiala amin' ny be sy ny maro?
|
|
