Text |
Ny vovoka, ahintsano. Akipaho ny nofo,
Avereno fa indrana, lamba mora miofo.
Inty ny akanjo fotsy. Ary inty ny kapa,
Avia, modia, ry oloko, midira aty an-dapa!
Ny tany nilasiana: tetezana mpamitaka,
Mampita fa mamefika . Loza mampibitaka .
Aty no azo antoka, tsy misy rebireby,
Avia modia, ry oloko, aza mba someby !
Zava-tsoan'ny tany, ankosotra mangirana,
Indray mitopy maso mandavo an-kodimirana,
Aty no tsy mba miova, aty no volamena,
Avia modia, ry oloko, tomoera ka monena!
Vokatra ao an-tsompitra, hasasara-maina,
Am-baravaram-pasana tsy mahatana ny aina;
Aty no fitoazana ..., fararano lava,
Avia modia, ry oloko, hijinja ny ambim-bava .
Ny zanakao afoizo. Ny vadinao ilaozy;
Aty andrasana izy, ny fiainanao havaozy.
Avelao ny havana voa lefona maranitra,
Avia modia, ry oloko, mila anao ny lanitra !
Ialao ny gidragidra , ny loza sy ny ankaso,
Aty ny Paradisa, tsy misy ranomaso,
Ho inonao ny tany, mpamingana mandady,
Avia modia, ry oloko, ry oloko afaka ady!
Faharesena an-tany no lalan-tora-tady
Diavin'ny mpandresy hamonjy lokan'ady ,
An-koatry ny hita maso, hitohy ny voatahy:
Avia modia, ry oloko, an-dapan'ny Fanahy!
|
|